每次蘋果有新產品推出，總成為焦點話題，新 iPad今日在港開售，儘管外形無變，但憑住比舊型號高四倍解像度靚芒，仍然搶盡全球目光，就算一眾率先試玩嘅名人明星，都對新 iPad嘅 Retina屏幕讚口不絕，若然不需炒價買入，全部都不約而同話買硬！ VIDEO
iPad 2跌到喊 新 iPad繼續升 今日新 iPad開賣，三禾電氣店長 Simon試過新 iPad後，評語係「勝在個靚芒，至於操作反應，就與 iPad 2差別不大。」由於新 iPad機外形沒大分別，故大部份機殼、配件都適用於新機上，所以入定多啲新配件，承接這個 iPad換機潮。
取代家中電腦 用迷戀嚟形容李純恩，絕不為過，由相約訪問到試玩，李生都雀躍得像一個小朋友。甫開機，即被《新蜘蛛俠》高清預告吸引：「你睇畫面清得幾誇張！真係好靚！」之後對各項功能一絲不苟地逐樣試，上網、開 Apps、影相、拍片、剪片，樣樣玩勻，仲不停用新 iPad為愛犬 Coffee大影特影，「雖然影相唔夠我部單鏡機靚，不過質素已算大躍進，一般生活照都夠用。」
等換機計劃 分別擁有 iPhone同 iPad 2，見慣靚嘢嘅趙式之，見到新 iPad仍讚嘆 Retina屏幕驚艷之處，一樣吸引到佢目光。「平常會以 iPad 2睇新聞、電影同玩吓小遊戲，對新 iPad嘅高解像畫質都好滿意。」雖然暫時對 iPad 2嘅工作需要及娛樂仍感滿意，不過她坦言蘋果若有換機計劃的話，必會考慮購買新 iPad。
靚得過份 做得靚女明星，當然對外形特別高要求。莊思敏拎起新 iPad，完全無流露興奮表情。原來 Jacquelin滿心以為新 iPad外形會有突破。「同 iPad 2完全無分別囉！」咪心急，玩吓先啦。試玩一輪，莊思敏表情發生微妙變化，尤其睇完《新蜘蛛俠》高清預告片，更係兩眼發光，大讚新 iPad個芒靚得過份！「開 Apps開 Games都好快，比 iPad 2更爽喎！」
方便執相 Michael Lau係大忙人，平時以 iPad用作資料搜集，慣性依賴 iPad在公事上的輔助，對於人見人愛的 Retina屏幕，自然沒有例外。而作為設計人，新 App《 iPhoto》能給他不少驚喜。「《 iPhoto》對於家庭式執相非常好用，多點觸控亦相當易學易用，對工作上嘅幫助會越嚟越多。」咁會否換新 iPad呢？ Michael唔使半秒已有肯定答案：「一定換！」
先處理舊機 陳議員日理萬機，新 iPad上網同操作都快咗咁多，自然輕易得到佢嘅歡心。 Tanya就試用自己嘅 iPad 1同新 iPad比拼上《蘋果日報》網頁，速度簡直有如阿伯同保特賽跑一樣，令 Tanya目定口呆。「日常工作我都有需要上網、修改文件、做簡報，新 iPad快咁多，絕對令我工作更順暢更方便。不過舊機仲用得，買之前要諗清楚點處理，免得製造多嚿電子垃圾。」
最想玩 4G 對 IT產品有認識嘅李兆富，認為新 iPad外形唔改無所謂，但比較失望的是 4G版未知何時到港，感受唔到高速上網嘅快感，果然「時間就係金錢」。李兆富看過新 iPad最大賣點 Retina靚芒後大讚，「不單夠清夠利，連顏色顯示都相當好。稍嫌喇叭並沒大改進，若要看電影，還是配搭耳機效果最好。」
學剪旅遊短片 唔少人都知 James愛旅遊同寫書，原來佢近排學埋剪片，實行用多媒體分享佢嘅旅遊經歷，《 iMovie》自然成為 James至愛。「一直覺得剪片要用電腦先掂，估唔到新 iPad都得，仲要行得咁順，啱晒我隨時剪輯拍過嘅旅遊短片。」又搞過場、又配音樂， James高興得話買硬！
有助 Fans溝通 艾粒二子無時正經，試玩新 iPad當然都成為佢哋發放笑彈嘅機會。艾粒先放大相中女仔嘅胸部，作勢話睇吓影相同埋個芒係咪真係咁清喎！之後仲讚新 iPad功能夠勁，有助跟 Fans溝通：「影相靚又可以執埋相，拍片又有防手震，又可以上網，方便我哋隨時 Upload，咁我哋遍佈全世界嘅 Fans就可以成日睇到我哋喇！」無嚟正經，真係畀佢哋吹脹。
VIDEO
語音辨識欠中文 雖然 Siri未有出現在新 iPad上，不過都有語音辨識輸入功能，幫你寫電郵、 Drop備忘，無 Siri玩都總算有代替品。語音辨識支援英、法、德及日語，可惜係未支援中文。實試一輪，發覺使用時需先連線上網，慶幸辨識速度不俗，用得好爽快，不過試用時成功率不算太好，例如靚女 Model讀了多次「 Hi， my name is Christie」，才能成功辨認輸入。
用眼辨認三大不同
外形雖然無驚喜，同一餅印之下，更係重了一些，厚了一些，不過，若與 iPad 2的數字比較，其實相差很少，拿在手上更是難以分辨！就算連包裝盒同配件佈局，都同舊 iPad有 99.9%相似。除咗可兼容大部份舊有配件，如 Connection Kit、 Smartcover，其實仲有幾個分辨新舊機嘅方法。
Retina靚過高清電視
雙核 A5X處理器，還有四核心圖像處理器，實際試用，對一般操作反應差不多，但對運算要求較高的軟件如《 iMovie》，拖拉片段就明顯順暢得多。網絡方面，新 iPad的 4G LTE與香港現行的並不兼容，香港亦未有 4G版的推出時間。講到新 iPad，似乎焦點都集中在 Retina屏幕上，事實上這是要親眼看過，才能真正了解比 iPad 2靚咗幾多！新 iPad畫質大升級， 9.7吋 Retina屏幕，解像度高達 2,048× 1,536，比起 iPad 2的 1,024× 768，像素高四倍，比高清電視的 1,920× 1,080更清更靚。
必玩 Apps 全新《 iPhoto》利用多點觸控，輕鬆調整相片效果，拖拉就可調整光度、飽和及對比度等效果，還提供多款筆刷及濾鏡，亦可製成日誌，放上 iCloud分享。
《 iMovie》製作 Trailer iOS版的《 iMovie》功能更加貼近 Mac版《 iMovie》，新版可以玩埋製作電影 Trailer，直接使用 iPad攝錄影片，並加入範本內，相當有趣。
《 GarageBand》一齊 Jam歌 《 GarageBand》除了提供多種樂器外，新版可讓用家 Wi-Fi Jam歌，同步打拍子，一起彈奏及錄音，就像真正夾 Band一樣。
《 Infinity Blade Dungeons》玩盡靚芒 Infinity Blade系列可以說是 iOS的名作，以畫面靚見稱，《 Infinity Blade Dungeons》用盡新 iPad的高解像機能，動作及光影效果都非常漂亮。
Apple New iPad Wi-Fi 處理器：雙核心 A5X
當日「界盒」情況，由秋煙提供
