先達回收價 - 黑色16GB iPhone 5, 只收 $7,550

剛剛賣咗部 3HK 黑色16GB iPhone 5, 先達只收 $7,550 !!! (16GB 白色話收 $8,000, 不過見唔到有人放白色 iPhone 5)
大家小心，如果黑色機，側邊有花要扣錢，扣 $200-$300 !!
上台機開盒唔扣錢，因為乜機都會開盒 check 機，試開機 , Check 有無花 !!

iPhone5回收價再插水

自從首日表現高收$8,800（16GB）之後，iPhone5的回收價便一直插水！究其原因，先達Sales解釋，主因係今次上網、上台出機容易咗，而且大家也明白，16GB最受回收商歡迎，所以供應數量激增，令回收價不斷咁插、插、插！例如黑、白色16GB，現時已跌至$7,500至$7,600就有交易；而32GB和64GB更慘，分別大減至只有$8,300和$8,800，連$1,000差價都無！Sales還建議各位，如果仲諗住買機即放嘅話，暫時最好還是選購16GB黑機，事關白色太多貨，可能又再出現黑機價高於白機嘅情況。

iPhone 5發售一周，港回收價急跌7400元至7700元

iPhone 5全球正式發售才一個星期，本港回收市場的價錢已經從高位回落，先達16GB版本回收價已經從星期日最高的8800元跌至昨日7400元至7700元一部，而且部分手機店更表明白色版本不收，有炒家戲言跌價之快是「早放早享受，遲放少幾舊（數百元）」。

「早放早享受 遲放少幾舊」

對比開售初期「係機都收」，目前手機店有選擇性收機的情况，先達手機店G-World Mobile負責人劉志剛表示，是因為白色iPhone 5的貨量充足，黑色反而缺貨所致。另有手機店主亦稱，由於傳出有一批澳洲水貨到港，貨源充足之下，因此回收價在短短4日間大幅回落。

事實上，iPhone 5首日銷情以16GB版本為最佳，回收價一度由原價5588元炒上至8500元一部，星期日更去到8800元高位，但星期二已經回落至最低8000元左右，昨日更跌到7400元。

買家仍以內地客主導

劉志剛稱，現時買家仍然以內地客為主導，而另一手機店主則說，內地一日未正式發售iPhone 5，則本港水貨始終仍有一定需求，但料回收價不會有太大機會上升。

先達 iPhone 5 炒價好吸引？最高見HK$8600 !!

原本說只能賺到HK$500至HK$1000的iPhone 5，但因為今日放機的情況有變，令其炒價出奇地好。我們親身到旺角先達看看，不少都放HK$8320，有些放HK$8400，最勁的時候，更見過HK$8600。

據在場線報的人稱，大部份來放機的，都是來自電訊商上台，來自蘋果商店的並不多，而且貨源亦有限。至於可以炒多久，其中一間先達店舖稱，估計16GB的HK$8000以上的炒價水平，可以維持一至兩星期時間。

當然，小編不建議大家炒賣，也不建議大量買入。

iPhone 5 開售，即買即賣賺3千

中環蘋果專門店外人頭湧湧

iPhone5今日全球多個地區正式發售。中環蘋果專門店外，早已有過百名網上中籤人士，排隊輪候認購，每人最多可買2部。有消費者買入新機後，隨即將手機售予店外的疑似水貨客，5千多元買入，以7千至8千元賣出，獲利3千元。

除了早前網上訂購外，電訊商亦透過月費優惠困綁式出iPhone 5。 

有消費者購入新機旋即出售圖利	中環蘋果專門店外有不少疑似水貨客者	不少果迷一早便到 中環蘋果專門店外排隊等候購買iPhone5
不少排隊人士邊把玩手機邊等候買iPhone5

先達 LO 哥報料 :第 1 手 iPhone 5 售價/回收價格

iPhone 5 水貸已經到達先達了！想知到賣幾錢、回收幾錢、好唔好炒等等的問題，看看以下訪問片段，G-World 的 LO 哥為你報上先達第一手 iPhone 5 資訊：

[轉載自 : UNWIRE.HK]

先達佬放風: iPhone 5 收 +$1500-2000 ！毋懼 Nano SIM．16GB 為佳

串哥做大型連鎖店，但同先達班老細都有傾有講。呢兩日 iPhone 5 一出，佢地班友懶得理你有冇新意，有錢賺就得，慢慢玩改 101 圖啦！琴日收到風，話大莊已經開到口收貨，實價就無喇，都係海鮮價要睇供求啦，但暫時保守估計 +$1500 – $2000 左右喎。串哥問佢有咩色會好放D，佢地話無所謂，只不過 16GB 就肯定好收D，因為風險低D。串哥問佢唔驚 Nano SIM 上面無得用咩? 佢條死仔笑笑口話串哥太唔明大陸人， iPhone 除左打電話仲有「其他」用途，好似「送禮」就係其中一樣喇，唔怕無巿．．串哥恍然大悟，上左一堂好好的國民教育。串哥咁聽就咁講，第時大家收唔番呢個價唔好黎搵我追討。

[轉載自 : UNWIRE.HK]

iPhone 5「炒家最多賺1000蚊」

iPhone5面世後，本港多家電訊商即時表示「有機賣」，CSL、3香港及數碼通都表示在下周五開始發售新iPhone，但要注意是本港暫得數碼通支援1800mhz的4G頻道，其他電訊商則仍在鋪設安裝中。

過往有新iPhone到港也會掀起炒風，但先達電話店G-WORLD負責人劉志剛昨天指，近來蘋果的新產品大致貨源充足，「最多都係頭幾日有水位，估計炒家最多賺1,000蚊左右咋，再遲啲水位會更低！」

iPhone5未必炒得起，另一個原因是水貨iPhone5在大陸無法使用。果殼網報道，iPhone5使用nano-SIM卡，比現在使用的mirco-SIM卡小44%，買到新機需到網絡商換機才可使用，若把現時的SIM卡剪成nano的大小，都無法使用。

iPhone 4/4S 先達回收價大跌

由於Apple iPhone 5快將推出，自從上星期末起舊有的iPhone 4、iPhone 4S回收價開始出現異常情況。在先達多間手機店中，有部分已暫停回收iPhone 4、iPhone 4S，至於仍有回收iPhone 4、iPhone 4S的店舖，其回收價亦明顯出現較大跌幅。於上星期，iPhone 4的16GB、32GB的回收價分別為$2,700和$2,800，今星期已跌至$2,300和$2,400，而iPhone 4S的回收價亦由$3,800至$3,900跌至$3,400至$3,500，兩者同樣跌價一成或以上。據手機店店員稱，此情況在所難免，同時相信要在iPhone 5正式推出後才知道舊型號的iPhone會跌至甚麼價位。

查詢: G-World Mobile (地址: 先達廣場1樓F112舖) (電話: 2396 6900)

[轉載自 : HKGOLDEN.com]

新 iPad 4G 炒燶，16GB 回收價齊頭數 $4950，僅賺 $62 !!

蘋果新 iPad 4G行貨前日開賣，網上登記預訂獲抽中首批買家昨到中環蘋果旗艦店取貨，有炒家即時到旺角先達手機店沽售，每部僅賺 62元，扣去車錢，只賺一餐「晏仔」；加上蘋果網上店昨同步網售新 iPad 4G，最快一周到貨，貨源充足下，料炒價再跌。有手機零售商揚言知悉下周大型連鎖影音店開售新 iPad 4G會以破底價發售，較蘋果官方定價再平 30元。

香港蘋果官方網站前日宣佈繼續以預先登記，翌日取貨形式售賣新 iPad Wi-Fi+4G， 16GB、 32GB及 64GB版價錢分別 4,888元、 5,688元及 6,488元。首批買家昨晨陸續到 IFC中環蘋果旗艦店取貨，門外未見人龍排隊領新 iPad，也未有人向買家搭訕收購。記者所見，有不少客人只購一部新 iPad 4G，強調是自用，認為 Wi-Fi版上網不安全，故購買 4G版上網較保障，「雖然 4G係用唔着，都可用番 3G」；亦有巿民只購買新 iPad Wi-Fi版自用或送給內地客人，認為「 4G用唔到，梗係買平 1,000蚊嘅 Wi-Fi版」。

連鎖影音店破底價發售

放大圖片

王小姐：「唔係咁識高科技，第一次買就試吓用 32GBWi-Fi版。」

部份炒家取貨後即日到旺角先達廣場手機零售店沽售，利潤少得可憐；其中手機店東京電訊職員表示，回收價只較原價高數十元，放售的人寥寥無幾，「蘋果產品一向都有得炒，今次真係有史以嚟最差，仲差過新 iPad Wi-Fi版」。同場的 G-World Mobile負責人劉志剛表示，新 iPad 4G如早前預料「冇得炒」，首批回收價僅較原價高出 62元，「好似 16GB回收價齊頭數 4,950蚊，呢個價唔會再升」。
劉透露，大型連鎖影音店下周起發售新 iPad 4G，定價會較蘋果官價下調 30元，「連鎖店同蘋果攞貨有折扣，佢哋咪可以跌破官方底價賣 iPad 4G，你話 iPad 4G係咪冇得炒？」劉早前引入逾百部水貨新 iPad，慘賠 10多萬元。

深圳搗走私，檢六億元iPhone iPad，在港買貨內地客近乎絕迹

深圳海關破獲一個利用「水客」以「螞蟻搬家」方式，將iPhone及iPad由香港走私至內地經網上銷售的龐大走私集團，檢獲逾四千八百部總值逾五億人民幣（逾六點一億港元）的蘋果產品，抓獲一百零四人，包括四名香港水貨客在內共六十八名疑犯正被內地刑事拘留。深圳海關該行動後深港水客走私情況急降，本港水貨手機店亦指三月底開始「冇乜人要貨」，生意大減三、四成，新iPad及4S炒價亦因而急跌。

深圳海關年初發現一間在全國近百城市都有加盟店的「藍優數碼」淘寶網店，在iPhone 4S仍未在內地開售前，以低價大量銷售產品，緝私部門展開調查，發現該店部分出售的是「水貨機」，該店收到定單後會向內地三大水貨供應商要貨，供應商再委託「水客」組織在港帶貨上深圳，形成有約十個走私團伙的集團。
海關上月廿六日派四百多名緝私人員分六十七個小組，在深圳、北京、廣州及成都等地同時展開行動，除拉人及扣貨外亦扣查現金二百多萬元，查封銀行帳款逾四百萬元，估計涉案網店單在去年已銷售走私iPhone及iPad逾十萬部。有指涉案網店昨晨刊登聲明指傳媒報道不實，會保留法律追究權利，但淘寶網站中午前已把該網店關閉。

在港買貨內地客近乎絕迹

旺角一間手機商負責人劉志剛指出，案發前每日有八至十名內地客購貨，每人五十至一百部，但現時幾乎銷聲匿迹，新iPad及4S炒價亦由最高峰比正價貴五百至七百元，跌至與正價相若。

理大生炒 iPad變蟹民，蟹貨 31部，一部只賺 12元

炒 iPhone、炒 GaGa飛、炒中銀紀念鈔，個個賺到笑，引發全城「炒嘢熱」！一班理工大學的學生「炒埋一份」，覷準蘋果新 iPad出籠，「集體」買入 31部新貨乘機賺快錢，豈料新 iPad炒極都唔起，這班大學生全部變「蟹民」。

黃女（黑衫）帶着七名同學，
相約記者在金馬倫道的滙豐銀行門口交易。

蘋果公司本月中在港公開發售第三代 WiFi版新 iPad，一班理大學生相信「蘋果神話再現」，經網上訂購了 17部 64GB、 4部 32GB和 10部 16GB的新 iPad，希望轉手，每部賺到三成利潤。豈料，新 iPad炒價極速回落，最低價僅賺 12元，令不少人「炒燶貨」。


這班大學生「蟹民」連日來心急散貨，周圍找出貨門路，記者日前以買家身份聯絡一名姓黃女生，她說：「我哋係學生哥，唔係炒家，不如你開個靚價，大家雙贏咪好囉，可以即時交易。」

黃女亦坦言去過多個地方問價，因價錢不合，故沒有出貨。她還相約記者翌日於尖沙嘴交易，其後要求改在金馬倫道滙豐銀行門口見面，以便記者即場存錢入其戶口，一手交錢一手交貨，又直言慎防收到偽鈔。

放大圖片

八名理大生用膠袋載着 31部新 iPad前來交易。

見面當日，黃女與七名同學帶同 31部新 iPad前來，記者直言先達 16GB版回收價僅 3,900元時，提出議價，但黃女「企硬」說：「先達回收價一向全港最低啦！」她們更堅信 64GB版可以 7,000多元放售（原價 5,488元）。此時，記者表明身份要求與他們詳談，眾人頓時一臉失望，「我寧願你係差佬，拉我哋好過啦！」

新 iPad炒唔起，小炒家都不敢「長揸」。記者到先達廣場發現不少人逐間問價，希望賣得好價錢，但新 iPad回收價猶如股票，相當浮動， 16GB版更徘徊在 4,000至 4,100元。有市民議價賣 4,150元，即被職員揶揄說：「你行下先啦！」

小炒家賺百元當津貼

放大圖片

部份小炒家直言，賺餐茶錢好過損手離場。任職酒店業的張先生賣了三部 16GB和一部 32GB，價錢分別是 4,100元和 4,820元，共賺 768元，「冇所謂啦，自己只係小炒家，賺到就賺」。他的朋友陳先生則以 4,820元賣了一部 32GB，小賺 130元。「當係津貼，有得賺已好好，唔會失望，（炒賣）始終有風險。」

在先達經營手機舖的「手機達人」 Lo哥表示，由於新 iPad跟 iPad2差不多，很難炒起，「我第一日收咗 200部，但第二日立即跌價，走都走唔切」。加上大量貨湧入回收市場，內地銷情亦不理想，蘋果產品必賺的神話，經已破滅！

先達 1 小時極速消化千部後門 iPad？

如果今日有去過先達，都會見到唔少巴打議論紛紛，事關因為先達右邊花園街出現大批大批落貨，裏面裝住好明顯就係「The New iPad」啦！大家可能會問串哥，先達有人落貨有咩咁奇？何止奇咁簡單呀，直頭驚奇！因為前後有兩架大貨車落住多箱新 iPad，新 iPad 開售第二日咁快有咁多疑似後門機真係非常誇張！

來自 HKEPC 討論區網友的圖片，有網友直指這是後門貨

點解係後門機？

同一般收返來的機唔同，今次呢一批貨，全部都係一箱 5 部的貨。首先，而家自己訂機最多都係訂兩部，一般 User 冇可能會收到一箱裝 5 部的官方訂貨。再者，呢批箱全部都冇 DHL 之類貼紙，同埋有 Reseller 至有o既專用標貼。所以串哥高度懷疑呢批貨係來自分銷商，再由某 D 大型連鎖店後門放出來！所以呢批貨令人懷疑係古惑行家的後門貨，有唔少網民仲話要 ICAC 介入添！

當日「界盒」情況，由秋煙提供

團隊精神，一小時 KO 千部 iPad

見到如此畫面，連見慣大場面O既我都甚為驚嘆，我呆左咁企o係度望左一個鐘。見到先達佬有團隊精神的一面，有人負責落貨，有人拆膠紙，有人界箱，界開 D 箱仲有婆婆即時收走，成個流水線勁過富士康！仲有一位老行尊大哥 (唔講邊間啦，先達入面5、6間鋪都係佢 ) 做指揮，「喂喂喂，點清楚呀，睇清楚型號呀！」，流程可以用高速來形容。呢一個鐘，目測可能處理左成千部 iPad。

如果真係後門貨，日日咁樣運成千部，D 炒家唔使炒機，先達入面細鋪亦都唔會有肉食，所以聽到好多炒家朋友同行家都好大怨氣！真係估唔到呢 D 疑似後門貨仲有幾多。

[轉載自 : UNWIRE.HK]