iPhone vs IT: 16 10月 2011

2011年10月22日星期六

iPad無《 Line》用，學玩魔術冧女

一個《 Line》搞到滿城風雨，最後變成「易 Line架」下架收場。其實無《 Line》用， iPad一樣有大把情趣玩意，好似黃埔新天地喺今、明兩日，搞咗個 iPad趣怪表演，其中德籍靚仔 Simon，就用 iPad變出一個一個魔術，在場女性無不如癡如醉。港男們，係時候學嘢喇！

德籍快手　網球神出鬼沒

魔術從來都係引人注目、打開話題的一大良方。如果可以配合埋潮人必備嘅 iPad嚟玩，自然更加所向披靡，包你大把靚女飛埋身。嚟自德國嘅 Simon Pierro，喺多年前已創作電視配合嘅魔術表演，近年 iPad熱爆， Simon當然唔放過又潮又方便嘅工具。一見靚女 Model， Simon即刻話要送見面禮，隨手一伸，神奇地拉出 iPad個 Home Screen，並化成一張實體卡紙！雖然唔係咩名貴禮物，但靚女一樣猛讚神奇又得意！熱身完畢， Simon繼續一連串表演，將網球由 iPad變出變入、隔空飲 iPad中嘅汽水，又用牛奶淋 iPad，甚至吹亂天氣女郎頭髮等等，完全將現實與 iPad影像二合為一， Magic！明知係配合時間嘅小魔術，但仍令人嘖嘖稱奇。

場中掌聲不絕，尖叫聲此起彼落，筆者當然想偷吓師，學番兩招必殺技，雖然大師最後唔肯收我做入室弟子，不過就鼓勵我花啲創意，然後多練習，一樣有機會創出自己一套冧女魔術。港男們，一齊努力研究吓喇！

放大圖片

■德國嚟嘅 Simon，以 iPad變炫目魔術。

■明明拎住個網球

■ Simon用力一拍

■網球又神奇地塞咗入 iPad！

■將手伸入 iPad，摷吓摷吓。

■將 Home Screen抽出成實物，神奇。

iPad當紙憑畫寄意

放大圖片

■由諗到畫， Armand唔使五分鐘已經完成畫作。

嫌魔術太難，畫畫會唔會易啲？橋唔怕舊，最緊要受，用 iPad畫畫成件事潮咗，相信一樣冧到女。不過要畫到好似 Armand咁好功架，就真係有啲難度。喺迪士尼製作過《泰山》、《花木蘭》等名作嘅 Armand，就畀啲貼士大家，除咗創意，亦都要熟悉你用嘅 Apps，畫起上嚟就更得心應手。唔夠五分鐘， Armand就即場畫咗幅靚畫，見佢個靚老婆一直含情脈脈望住老公，全情投入咁畫，就知畫畫絕對有 Market！

放大圖片

■ Armand推介畫畫 Apps：《 SketchBook Mobile》 US$1.99

放大圖片

■不忘向 Steve Jobs致敬，畫功好細膩。

Jam出冧歌有情人

放大圖片

■主音馬仔就話用 iPhone可以隨時作曲隨時錄，夠晒方便。

俾外國人威咗咁耐，終於有港男表演吓冧功。 RedNoon一人一 iPhone，即 Jam即唱，譜出一首經典《傾心》， Model冧到差啲暈低。 RedNoon話 iPhone樂器夠方便，隨時隨地都 Jam到歌，自彈冧女啱晒。咁有經驗，原來佢哋早有前科，幾年前已經喺佢哋嘅網上短片《周圍唱》中試過當街唱歌冧女，自問有音樂才華嘅，不妨挑戰吓佢哋！