微軟一向係科技界一哥，但係 Google喺科網泡沫爆破之後就急起直追，由搜尋器到 Android手機，都令到微軟失色。蘋果更加唔使講，藉住 iPhone從後趕上，無論市值抑或注目程度都超越微軟。不過，微軟全球資深副總裁張亞勤就話，唔在乎市值，仲話「呢啲競爭先係 IT界嘅魅力同興奮點」。
內地傳媒稱呼張亞勤做「超級神童」， 12歲已經係中國最年輕嘅大學生， 23歲做博士， 34歲執掌後來改名微軟亞洲研究院嘅微軟中國研究院， 38歲俾蓋茨欽點做微軟全球副總裁，係喺微軟裏面權力最大嘅華人。
張博士前排喺香港出席亞太互聯網科技高峯會，華華有幸同佢傾偈，張博士話：「我哋仍然係利潤最多嘅……所以唔在乎市值，最緊要專注產品開發。」佢仲話：「呢行每 5年競爭對手都會唔同咗，總有新競爭對手。」張博士又如數家珍咁介紹微軟產品點多元化， Windows 7作業系統（ OS）點好賣、伺服器生意仲已經達 150億美金，遊戲機 XBOX亦超過 100億美金……
張亞勤被譽「超級神童」
瓣數咁多，正所謂周身刀，唔會把把利，張博士話，過去幾年都犯過錯，好似平板電腦咁，微軟係就係老早搶閘，但最後無跑出，張博士指可能喺執行方面出咗問題。
佢又同華華講，自從智能手機同平板電腦主要用 Google同蘋果嘅 OS之後，呢個市場競爭好激烈，微軟同諾基亞合作，借助諾基亞多媒體應用能力，贏到更多亞洲市場佔有率。張博士形容，家陣手機市場係「三國演義」。
中國科網泡沫最堪憂
咁成個科網市場又點睇呢？美國連番量化寬鬆，令市場有大量資金，矽谷已經有人指科網又有泡沫，張博士話，今次如果泡沫爆破，規模會比上次細，因為今次嘅科網公司大部份都有業務、有錢賺，差別只係賺多定賺少。要講泡沫，中國嘅泡沫仲令佢擔心，「我識得幾個後生仔搞科網，唔知做乜，但個 valuation（估值）已經有 1億人民幣。」聽落情況又真係有啲似曾相識，幾令人擔心。
張亞勤勸 IT人 咪掛住搵快錢
中國大陸係出名嘅翻版天堂，作為微軟華人一哥，張亞勤就認為呢個係環境逼成。張博士同華華講，中國市場咁大，大家都滿足於抄美國嗰套，因為風險細啲。就好似美國團購網 Groupon興起，大陸即刻就有超過 2000個團購網。仲有，以前 YouTube紅，亦有百幾個相似嘅視頻網，「當中有幾多成功？可能只得幾個……如果你有兄弟整網頁，好似 Groupon咁，你就要小心啲。」
張博士又話，中國科網公司有太多「泡沫心態」，一心想「搵快錢、馬上 IPO」。佢話佢睇咗講 facebook嗰套電影《 The Social Network》， Mark Zuckerberg為咗報復前女友同識女仔，就創建咗社交網站，張博士話，「 Mark Zuckerberg創立時係想解決問題，個問題可能同其他人唔同，但就唔係為咗賺大錢，賺錢只係 by-product（副產品）。」所以中國 IT人應該諗點樣解決實際問題，咪淨係掛住搵快錢。
張亞勤簡歷
出生：
• 1966年山西太原
職位：
• 1999年加盟微軟，現職微軟公司全球資深副總裁及亞太研發集團主席
•曾任美國 GTE實驗室高級研究員、美國 Sarnoff公司多媒體實驗室總監
學歷：
•美國電氣電子工程師協會院士
•畢業於哈佛大學高級企業主管項目
•美國喬治華盛頓大學電氣工程博士學位
•中國科技大學電子工程碩士學位及學士學位
• 12歲考入中國科技大學少年班
沒有留言:
發佈留言