星期日係驚蟄，傳統係打小人日子，唔使民調不必街訪，今年打小人頭號目標人物非財爺鬍鬚曾莫屬，恐防當日鵝頸橋塞到爆，八方建議大家去中環打小人，「人民力量」發起「財爺打得少，全民憤怒鳥！驚蟄創世紀，全城打小人」大行動，仲已經聯絡健力士世界紀錄大全，希望可令最「屎」財爺鬍鬚曾名留青史。
出席者請自備舊鞋
驚蟄當日泛民在中環遮打花園舉行反預算案集會，有份搞呢個打小人活動嘅林雨陽同八方講，當日下午兩點半開始喺旁邊遮打道行人專區打小人，呼籲市民「打」完鬍鬚曾後先參加集會遊行，佢呼籲不滿預算案、鬍鬚曾嘅市民務必到場，大家同心合力創造世界紀錄，讓全世界都知道香港人對呢份預算案怨氣係幾咁深重。
林雨陽話當日會提供鬍鬚曾頭像供市民打小人，如果市民仲想「打」其他高官，亦可提供白紙俾大家寫上官員名字「打」個痛快。據說打小人用舊鞋為佳，越舊嘅鞋效果越好，呢方面主辦單位不能幫手，大家請自備舊鞋「招呼」高官。
打小人習俗可能有人覺得係迷信，林雨陽稱呢次集體打小人活動冇乜宗教色彩，希望俾個機會市民以輕鬆氣氛去抗議，「所以不論有乜宗教信仰，都可以嚟玩吓，表達不滿」。佢又指一般相信，可以藉打小人去驅趕帶來噩運嘅「小人」，而越多人打小人越靈驗，因此越多市民到場，令鬍鬚曾聽取民意修訂預算案機會越大。
其實唔使等到驚蟄，已經有唔少網民幫作「超級無敵全壘打」以鬍鬚曾為目標打小人，仲一邊打一邊唱衰鬍鬚曾：「打你個頭，打到你俾人劏死牛；打你個腦，打到你甩鬚乜都冇；打你個太陽穴，打到你啲 MPF係咁蝕；打你執鬚，打到你血壓日日高！」
外傭團體讓路集會
林雨陽話打完小人可參加遮打花園集會，而負責場地安排嘅張文光話，今次搞得成集會，要多謝外傭團體讓路。家陣民怨大爆發如箭在弦，泛民成員之一、醫護界議員李國麟據講未決定企哪一邊，因為佢支持預算案，但又無反對周日集會，態度曖昧。
沒有留言:
發佈留言