麥當勞搞結婚派對，供五十人參與的「套餐」收費料少於一萬元。

依家啲婚宴酒席競爭相當激烈，鬥豪鬥環保，又要鬥 gimmick，先會殺出一條血路，好似麥當勞今次夠晒創意，居然諗到條橋，全港首創快餐店結婚派對服務，唔食鮑魚食漢堡包，咪話唔盞鬼。

小妹噚日打畀麥當勞靚女公關 Helen問吓點解咁有諗頭。佢解釋話，其實接到唔少客要求，想喺麥當勞搞婚宴，呢啲準新人話，大家相識喺麥當勞，拍拖喺麥當勞，所以咪連結婚都要喺麥當勞喎。原來食包可以媾到仔，姊妹們就唔使使錢參加 dating party啦。

Helen話，之前有一 pair新人試過喺麥當勞包咗半個場搞婚禮，賓主盡歡，加埋徇眾要求，決定出年 1月 1日公開推出婚宴服務，暫時只限金鐘海富中心、上環士美菲路同埋美孚廣場三間分店，婚宴餸菜當然係漢堡包、薯條啦，仲會同新娘度身訂做麥當勞氣球婚紗，設計埋場地同遊戲，「好似玩新郎、玩新娘環節，會叫新人一頭一尾食薯條，食幾啖咪 kiss到囉。」

今次麥記推出婚宴服務幾有創意，好啱一啲經濟能力有限、又想結婚嘅年輕人，「啲酒席只不過食包飲汽水，佢哋負擔得起」。

麥當勞叔叔為你證婚

麥當勞叔叔為你證婚、新娘身穿氣球婚紗、新人同切巨型結婚漢堡包……一切幻想都可成真。連鎖快餐店麥當勞將於明年一月一日起，推出結婚、訂婚及周年紀念派對服務，更可應客人要求製作氣球花球、蘋果批結婚蛋糕、氣球婚紗等突破傳統的婚禮飾品，供五十人參與的「套餐」收費料少於一萬元。

麥當勞企業傳訊及關係總監張婉玲表示，近兩年，每月都接到約十宗舉辦婚宴的查詢，最近幾個月查詢電話更多。早在三月時，曾應一對新人要求舉辦百人參與的結婚派對，反應理想。

由即日起，麥當勞將開始接受預訂婚宴派對，場地包括金鐘海富中心分店、美孚分店及堅尼地城士美菲路分店，可容納五十至一百人，現正構思不同套餐，預計包五十人基本收費，會少於一萬元，包括場地基本布置、麥當勞美食、新人結婚禮物、嘉賓禮物、簡單音響設備及司儀等。

網上找到抵死餐單，仲有埋相先至晒夠頂癮 :

頭盤:
時令沙律
百鳥歸巢粟米
金碧輝煌蘋果批

主菜:
紅燒魚柳
燒豬柳漢堡扒
脆炸麥樂小學雞
香脆鮮炸歐陸薯條
扭扭粉走扭扭粉湯
Fantastic燸米飯

甜品:
百年好合新地杯[附有奧地利朱古力、美國士多啤梨口味選擇]


飲料:
1982 年可樂
1892年提子奶昔
鮮磨陳年咖啡
夢幻奶茶(北海道牛奶配以英國高級紅茶沖製)