天氣女神《黃婉曼》推銷施政報告

特首曾蔭權噚日發表《施政報告》，話要多 D 利用新媒體同市民溝通，而且真係坐言起行，佢宣讀完施政報告後冇幾耐，就即刻用 facebook 向市民介紹報告內容，而且仲搵埋近期人氣急升既「天氣女神」黃婉曼客串拍咗幾條短片，硬銷施政報告有幾好。

站地圖前 介紹各區措施

黃婉曼係其中一條短片中做返老本行，企係地圖前面報告各區情況，不過今次唔係講空氣污染，而係介紹施政報告有關各區既措施，佢仲重新演繹成名句「帶大家跳出香港」，因為有唔少老人家都係「跳出香港到內地退休」，所以政府都要多多照顧佢地。講明係天氣女神，黃婉曼自然有唔少「宅男粉絲」，所以另一條片專攻後生仔，講解施政報告內既青少年政策。

黄婉曼帶給你今年施政報告內各區的政策亮點(上亞厘畢道Facebook 短片)

黄婉曼介紹今年施政報告有關教育和年輕人的... (上亞厘畢道Facebook 短片)

黄婉曼同你講今年施政報告的房屋及土地計劃(上亞厘畢道Facebook 短片)

網民：政府做得最好一次

網民反應都唔錯，有人話「支持，這是政府做得最好的一條片」、「都幾新鮮呀﹗睇下無妨」；不過亦有網民認為「唯一的亮點是否就是黃婉曼 ?!」

家中預演3次 煲呔聲沙

另外，噚日聽到煲呔把聲沙晒，打聽之下原來佢噚晚係屋企「預演」咗3次份施政報告，以每次要讀成兩個鐘計，大大話話都讀咗6個鐘，所以就搞到聲都沙晒。係 facebook 度睇到幾張煲呔噚日去到立法會，等緊入去會議廳個陣影既相，見到佢同立法會主席曾鈺成、秘書長吳文華坐埋一齊個陣，煲呔竟然顯得好緊張，坐到全身僵直，目無表情，同旁邊神色自若既曾鈺成相比，真係差天共地！