嫌港女刁蠻奄尖，參加熱爆相親節目，筍盤港男上大陸電視尋真愛

港女、剩女、敗犬女近年成為熱話，各大小網上討論區上港男港女唇槍舌劍。根據統計處資料， 09年香港「剩女」多達 5萬人，男女比例嚴重失衡，每 1,000名香港女性對 889名男性，在港女尋覓姻緣告急下，對優質港男「爭崩頭」，然而有「筍盤」港男卻揚言不要港女，選擇上大陸熱爆相親節目《非誠勿擾》拖走北方姑娘。到底港女們輸了些甚麼？

「香港女仔比較刁蠻，而且刁蠻到唔知自己刁蠻，我覺得人最可怕嘅係唔知自己發生咩事，佢所有事都覺得好應該嘅！」 28歲、土生土長港男楊春龍 Penny斬釘截鐵說，不會選擇香港女性做女友，更不會娶港女。

放大圖片

北京姑娘張絲絲穿上古裝，氣質優雅。互聯網

放大圖片

楊春龍曾任職香港海關，穿起軍裝的他英明神武。受訪者提供圖片

出身小康　事業有成

身高 1.84米、 40吋胸肌的 Penny擁有模特兒般的天賦條件，型英帥靚正，出生小康之家，在英國留學五年，取得商業管理榮譽學士。 06年回港，翌年加入香港海關駐守機場，但前年離職決心北上發展。有十年 eBay生意經驗的他，不但於大學時代已賺取第一桶金，日前更獲 eBay垂青聘請為項目經理，本月中便正式到上海上班，是名副其實的「筍盤男」。
今年 2月，朋友找他作伴參加由江蘇衛視主辦的交友相親節目《非誠勿擾》， Penny在無心插柳下入圍。他笑說在節目中，無論跟主持對答及真情剖白，均是臨場「爆肚」，事前亦沒被安排與參加節目的 24位內地相親女子見面，絕無「造馬」。
節目於 3月 19日播出，西裝骨骨的 Penny甫出場已向在場嘉賓、主持和美女大派潤喉糖，博得其中 23位美女好感，更令 22歲北京姑娘張絲絲對他一見鍾情。經過一輪妙問妙答後，二人終於「成功牽手」繫上月老紅線。
「佢讚我高大、聰明、得體，在節目中咁大壓力都好鎮定。」 Penny認為兩人能走在一起，因大家都熱愛運動，又有留學背景，有共同話題：「我咩運動都啱，佢就係澳洲乒乓球國家隊員，我以前都係乒乓球校隊。」張絲絲從沒戀愛經驗，早前被父母催婚，故參加節目希望找個孝順、勤奮、講求衞生的好男孩。「佢父母想佢搵番中國男仔拍拖、結婚，同聲同氣啲！」 Penny說。

放大圖片

在澳洲讀書的北京女孩張絲絲性格活潑好動。

放大圖片

Penny在街上不時吸引女士們目光。張軍攝

聚首兩天　相隔異地

放大圖片

因張絲絲要回澳洲繼續學業，她與在節目中結下姻緣的楊春龍拍拖兩天後便要暫時分離。

雖然兩日後張絲絲即要飛回澳洲繼續學業，但節目拍完當晚， Penny已抓緊時間約女友邊喝咖啡邊談情：「佢除咗靚女，性格率直爽朗又聰明，最重要夠真誠！」可惜女友尚有一年才畢業， Penny現時只能用視像和電話隔空傳情。
Penny說，喜歡北方姑娘簡單直接，「佢仲問定我將來結婚，想在邊度落地生根。佢會以男友或老公為中心，嫁雞隨雞，但香港女仔就以自我為中心。」
其實 Penny不選港女，完全是怕了她們的「公主病」。單是約港女食飯已經令他身心俱疲，「佢哋會話食飯呢啲嘢你諗嘅，你諗唔到就唔好叫我食飯啦！」即使男方想好地點、訂好座位，港女又會奄尖挑剔。

港女獨立　難開心窗

Penny在 28年來只拍拖兩次，最令他難忘的初戀情人就是香港女孩。事實上他沒遇過「野蠻」的港女女友，亦沒有針對港女的意思，只感到港女不是他的那杯茶。
「香港女仔太獨立、自主，在經濟上又唔使靠男友，久而久之佢哋會追求平等的生活態度。但男人需要女人關懷，佢哋就係打開唔到心窗。」他坦言內地女性對男友很會見微知著，更會煮好飯菜等男友下班，這才是男人背後的稱職女人。
港女們，點睇？

楊春龍小檔案

香港人（ 28歲）
在英國留學 5年
考獲經濟學碩士
06年回港發展執教鞭
07年考入香港海關
09年辭職到內地經營網上生意
獲聘於上海 eBay項目經理一職

張絲絲小檔案

北京人（ 22歲）
澳洲碩士生
父母是體育機構公務員
現為澳洲乒乓球國家隊員

遭批評　港女反擊　勝在獨立自主

港女常被負面標籤，暫未嫁出的更會被揶揄為「剩女」。對於 Penny對港女的評價，有豐富拍拖及甩拖經歷的 29歲地道香港女孩 Maggie又如何反擊？「我認為要評價港女，只有一個字──『好』！」 Maggie說。

拍拖十多次的 Maggie認為要評價港女，只有一個字──「好」。

八年拍拖十多次

任職幼稚園教師的她， 18歲初戀，維持了三年，其後八年拍拖十多次，經常去「飲嘢」識男仔，現任男友是經婚介公司活動結識。她認為港女絕對是「瑰寶」，現今港女大多事業有成，經濟能力佳，個性獨立、自主，絕不比內地女性的溫柔婉弱遜色：「其實唔少男士都鍾意性格獨立的女士，反而唔鍾意女仔過份依賴同黐身。」

對港男可謂瞭如指掌的 Maggie認為，最難頂的頭號港男就是「算盤人」：「幾蚊幾毫都要計得清清楚楚，聽過有男仔約女仔去花園餐廳食飯，食咗 80幾蚊，都要個女仔夾返 40蚊，可能佢哋慣咗同同事食飯係咁啦！」

回想過去十多段戀情均未能開花結果， Maggie歸咎於男女溝通問題：「 20歲出頭的男友大使又鍾意碌卡，唔係買模型就買運動用品，成日掛住打機、去玩」；有經濟能力的男友，則很專注事業，「對自我要求高，仲會將呢啲苛刻要求『過戶』到我身上，成日嗌交」。她說，現今娛樂模式傾向個人化，催生不少「宅男」：「家啲香港男仔好多都沉迷玩電腦，喺網上同人 chat已經好開心，反而唔急住喺現實中搵個伴。」 Maggie認為每個人也有優點缺點，不應單方面貶低香港女性。

港男港女句句碰

楊春龍:男人需要女人關懷，但因為香港女仔比較獨立、自主，較難打開心窗。
Maggie:可能係佢不解溫柔，女士不嬲都喜歡同人講心事。

楊春龍:內地女仔好直接，認識唔耐已經會問「會唔會同我結婚」；香港女仔就好似跳 Cha Cha咁，你進一步，佢又退一步。
Maggie:香港女仔比較含蓄、慢熱，確係唔及內地女仔咁主動，係因為佢哋希望得到物質享受，另一半對佢哋嚟講唔單止係老公，仲係老闆！

楊春龍:香港女仔比較刁蠻，而且刁蠻到唔知自己刁蠻。
Maggie:女仔係唔係挑剔奄尖，要睇成長背景、家庭教育，唔可以一概而論。其實唔少港男都有「皇帝病」，揀女友好似揀妃嬪。

楊春龍:香港女仔太過以自我為中心，大陸女仔以家庭或老公為出發點。
Maggie:呢個係「等價交換」，內地女士係「有目的地溫柔」，香港女仔可以自己照顧自己，自然唔使咁熱情如火。

三高令男士卻步　獨身女求助升

不要以為「剩女」的意思是「賣剩蔗的女人」，其實國家教育部於 07年將「剩女」納入 171個漢語新詞中，定義為「擁有高學歷、高收入、高智商、長相也無可挑剔，因擇偶要求過高導致在婚姻上得不到理想歸宿的大齡女青年」。
明愛向晴軒設有「愛情專線」（ 3161 1222），社工陳幽說，每逢長假期單身女士求助個案會飆升，而上年度處理 1,314個求助個案中， 65%是女性，當中 30%是單身，而獨身女性中， 40%有大專或以上學歷。
陳認為，香港女性都面對「三高」致命傷，即高學歷、高收入、高齡，她們往往因事業有成、經濟獨立、工作時間長，令男士卻步，加上她們享受被追求，着重時間觀察對方是否有誠意，只要男方在特定時間內無收到女方正面回應，戀情便告吹。

80後少女面對現實

有緣人婚姻顧問 Shirley說， 35歲以上的女士最難搞：「佢哋好多都單身咗一段日子，心態上覺得要拍拖就要揀到個 prefect嘅，仲要求對方有好好嘅經濟能力。我哋份表格薪金要求嗰欄最高係 6萬蚊以上，佢哋就要填 10萬以上！」
她又說：「佢哋仲好陶醉於 7、 80年代嗰種『為妳鍾情』嘅戀愛模式，希望對方追求自己好耐，反而 80後嘅女仔比較現實，覺得女追男無問題。」