大大隻字「窮人恩物」- 香港貧富懸殊有幾厲害，從地產代理嘅廣告就可能睇到

香港貧富懸殊有幾厲害，從地產代理嘅廣告就可能睇到端倪。Emily噚日見到facebook熱傳一張地產代理推銷荃灣楊屋道樂悠居753平方呎單位嘅廣告，410萬元開價，但用大大隻字「窮人恩物」做標題。有網友話廣告「黐線」，有網友話，呢個單位若做七成按揭，首期要123萬，想起以前有100萬現金已經係百萬富翁，難免有啲感慨，有網友話，「窮人」定義要重新定位咁話。

Emily好奇之下計數，若「窮人恩物」住宅以2.2厘息、分20年做七成按揭，每月供款1.48萬元，以五成供樓負擔計，已經超過本港家庭入息中位數（約2.1萬元）。換言之，按代理嘅邏輯，本港逾半家庭都係窮人。有網友嘆氣，話喺香港生仔、買樓各要400萬，不如研究移民瓦努阿圖算嘞。