iPhone Game : 《Rainbow Six: Shadow Vanguard》最緊要 Head Shot

呢排英、法聯軍怒炸利比亞狂人，一時之間全球刮起反恐熱潮，《Rainbow Six》遊戲開發商UbiSoft趁機把「彩虹六號」部隊帶到iPhone，齊齊殺狂人、救人質。不過最緊要瞄準打頭攞高分，否則用來用去都係得支步槍仔，真係開槍都按到手軟！

10人連戰對打

《Rainbow Six》最正係要玩組織、考戰略，唔係一味衝衝衝就可以過關。今次iPhone版都唔例外，玩家要扮演新上任軍官，帶埋兩位同伴深入虎穴，過程中要向他們發出潛入、開槍及掟閃光彈等指令，少啲戰術都玩唔掂！故事模式共設11關，由大使館、油田打到非洲叛軍基地，場景多變，配合專用物理引擎，立體效果相當出色。遊戲另可接駁Wi-Fi，支援最多10人連線對打，亦可約埋另外兩名玩家組隊打電腦，齊齊搶分攞隱藏嘅武器。

 
畫面右下方設有瞄準掣，方便Head Shot敵人。

 
主角可指揮隊友開門、偵測或掟閃光彈，然後從後作出支援。

 
要儲分取得成就，先攞到霰彈槍、衝鋒槍等重火力武器。