阿蘇教你賺兩億，隨身 iPad 和 iPhone 4 潮爆過人

「我要賺兩億！」這將會是蘇施黃未來 10年的座右銘，惡死過導遊阿珍的阿蘇今趟唔再教人煮餸介紹美食，明日起她會在圓方 The Grand戲院舉行一連 15場的賺錢講座，實行化身嚴師教人搵錢秘訣，最重要是教你定下做人目標，不要像她 hea足大半生才懂得發憤銀，到時近 15,000人將會成為「蘇嚴師」的高徒，阿蘇大派定心丸表示講座人人啱聽，更揚言只要跟足「 SMART」的搵錢方式就個個都有機會賺到兩億。

現年 55歲的蘇施黃明天起至本月 22日逢周一至周五會在圓方 The Grand戲院舉行 15場「我要賺兩億！」講座，到時阿蘇每日做足三場，每場同你 talk足一小時，門票 100元，用 100元換來兩億的夢，絕對物超所值。

患病頓覺錢重要

放大圖片

蘇施黃自言 hea了多時，經歷患病後令她茅塞頓開誓言要發憤搵錢。

阿蘇以惡死見稱，今趟踩過界做「蘇嚴師」，教授 15,000名高徒，她自言一切都從 50歲時患病開始，她覺得自己很幸運，因為朋友、公司、屋企人，包括上帝都不斷給她機會，但她恐怕今次是最後一次機會，她日前接受訪問說：「 50歲前自己嘅搵錢態度好 hea，病咗之後就好似一隻馬戴咗眼罩，會好 focus。我喺 50歲前以為人生目標就係開心，打場麻雀係開心，喺屋企唔做嘢又開心，但呢啲開心要有時間有錢同自由先可以話想點就點，我 50歲前只係有少少時間、少少錢同好多自由，所以我就誤解咗，當我一病時 income會 drop，又冇咗自由，時間又大部份放喺張床上，但人生咁係唔得。」
於是阿蘇在卧病時想起以前做保險時的一條賺錢公式「 SMART」，她也為人生定下明確目標，並於 3年前定下要在 55歲前賺 1千萬，她坦言去年 8、 9月已達標，現時她已定下另一更大目標，就是在 10年賺 2億，不要以為這 2億是信口開河，事實上這數目是經阿蘇深思熟慮，她說：「我父母今年 90大壽，自己又大使，如果慳慳哋一年使 200、 300萬，計吓計吓如果開心地活到 100歲就仲有成 45年，我計過要成 2億，我要為自己預備將來，當 set咗兩億後就要諗點搵呢嚿錢，我搵咗好多賺錢高人出嚟飲茶，同佢哋講我有個新目標就係要賺 2億，不過初初大家都當我玩吓，有個老友就叫我轉型，仲要我自己諗吓做乜。」

獲黎智英過兩招

放大圖片

教慣人煮餸的蘇施黃，今次轉型講搵銀之道。　資料圖片

事實上阿蘇定下目標後就如重回幼稚園一樣，因為她要重新思考，每見賺錢奇人都不恥下問，並坦言上個月才到黎智英家中午膳，請教賺錢秘訣，她說：「佢咁多百億都賺到，於是佢又講咗少少嘢畀我知，之後我就集合晒所有嘅說法，再加埋自己性格同做咗 50幾年人嘅經驗，我就喺今年 1月開始搞自己嘢，主力係賣鮑魚、西班牙火腿同魚子醬，但就未公開發售住，不過單係搞個包裝就已經搞咗 4個月，真係嘔咗我八桶血，不過我家仲學緊。」

搞講座僅花$150

今次講座也是阿蘇的賺錢渠道，她自誇由構思到籌備，她全程只花了 150元，她說：「朋友話我做生意咁蠢，叫我斗零都唔可以拎出嚟，不過要唔用錢做騷真係好難，但只要 turn garbage into gold，即係將垃圾變銀紙就可以，於是我開始搵 The Grand，叫佢將啲垃圾時段賣出嚟，好過得兩個人入場睇，我又打畀黎智英，話我同佢寫咗十幾年嘢，可唔可以落廣告畀 discount，打咗好多友情牌，呢啲都儲咗幾十年，家唔用等幾時。」阿蘇揚言只要嚴格跟隨「 SMART」公式， 2億就人人都可以賺到，她更誇口說：「就算冇 2億，最渣嗰個都可以賺到 1%，渣到白癡都會有 200萬啦。」

解剖 SMART

SMART發達目標方程式
S---Specific　具體
M---Measurable　可數的
A---Attainable　能力可及
R---Realistic　實際可行
T---Trackable　可追溯的

阿蘇今次講座會以一個簡單的「 SMART」賺錢公式教人如何成功的搵錢秘訣，事實上「 SMART」即指「 S」 Specific、「 M」 Measurable、「 A」 Attainable、「 R」 Realistic和「 T」 Trackable，阿蘇形容這條「 SMART」公式是不少保險和傳銷行業中人都熟識的，她也學足 20多年，對這條公式滾瓜爛熟到足以教人，不過要真正將公式實行和融會貫通，就仍有一段距離。

定下人生目標

放大圖片

一向出口不饒人的阿蘇表明在講座上也會貫徹鬧人本色。

阿蘇表示這條公式的第一樣最重要是 Specific，即具體，她說：「好似開心就唔具體，但搵兩億就好具體；第二樣就係 Measurable，即數到，開心數唔到； A係 Attainable即能力做得到； Realistic唔好坐喺度話同法國總統食餐晏，李嘉誠打本畀你做生意，呢啲就唔 Realistic；最後係 Trackable，係講時間，即係你要有個 timetable，將呢五樣嘢好嚴厲排列出嚟，自己可以好簡易做測試，測試你嘅人生目標，如果你目標過唔到呢個『 SMART』，即係你錯到不得了，咁你就要睇吓邊度錯嘞，然後要做番啱佢，因為你過唔到，你人生會嘥咗好多時間。」
阿蘇謂雖然很多人都知道「 SMART」這方式，但卻永遠都像套不到在自己人生內，她表示中間一定有原因，她覺得最重要是人生一定要有目標。

攜過萬 iPad潮爆

不要看年過半百的蘇施黃平日粗粗魯魯，打扮只是簡單隨意的恤衫西褲中性打扮，就以為她老土 out爆，事實上阿蘇非但沒有與時代脫節，隨身之物更全都是時下潮物， iPad和 iPhone 4不離身，夠堅夠型。

認真上網查字

放大圖片

現年 55歲的蘇施黃絕對冇同時代脫節，手持逾萬元訂製的 iPad，潮爆過人。

阿蘇做事認真，她接受訪問時提到 Specific這個字時，她一時語窮，想不到用一個合適的中文字眼來形容，於是她即拿出 sharp爆黃撞紅色外殼的 iPad出來上網查字典。
不要以為阿蘇的 iPad外殼是普通街邊貨仔的價錢，事實上她的 iPad外殼價值不菲，潮爆阿蘇透露她那部 64G的 iPad連外殼從美國訂購回來，價錢是雙倍盛惠過萬，不過以現時阿蘇日理萬機的情況，相信 iPad真的幫她不少。