周秀娜電子書初露，$30 iPad任睇

月費：$20-$38

細細個鍾意租漫畫，每日$3小學生都花得起；但嚟到書展掃貨，至少也得一千幾百，想慳？有辦法！攞起手上部 iPhone或 iPad，直接單撈電子版！以全城宅男期待、娜姐新作《 Les Vacandees d'Amour精華版》為例，本地網絡商更首推$30月費任睇，唔想滴晒汗行書展?諗諗佢！


■大量 o靚模寫真上晒 3Books，大家唔使行書展喇！

4頻道月費抵過逐本買

想用 iPhone玩電子書？但蘋果未出港版 iBook，變咗要上 iTunes慢慢搵，仲要整個 Apps下載，完全無分類、又唔統一！ 3仔今次推出 3Books平台，實情係結合咗 24reader、世華文庫、 Kobo等幾間電子書出版商之力，藏書量總共有幾多？佢哋無答！但大家最緊要注意 24reader嘅任睇月費 Plan；簡單講，佢分為 4條頻道，各有收費，例如提供雜誌娛樂嘅「基本頻道」，每月$38；鍾意睇 o靚模寫真、介紹新 Game嘅「跨傳媒頻道」，月費就要$30。

就算唔講都知，周秀娜、 A.Lin同 Da Da本寫真肯定最多人搶，但如果你嫌一個月任睇太短暫，亦可一次買斷，$35就搞掂！據稱 3Books月費任睇書籍大約有 1,000本，藏書量唔算多，但勝在全部係本地嘢兼中文書，夠親切嘛！至於月費抵唔抵睇好見仁見智，例如 iPhone或 Kindle嘅電子書售價，普遍由 0.99至 9.99美元不等，而本港以 Apps形式單撈嘅電子書，每本大概$15-$30就有交易，前者書種多，後者價錢平，各有優劣。

■每本書都有封面畀大家參考。


■《 Les Vacandees d'Amour精華版》畀$30就可以一個月任睇。

首部 3D電子書登場


■呢副 3D眼鏡唔使額外購買，買書時會附送。

邊個話書一定係平面 o架？除咗搞任睇月費吸客， 3Books更同《 in3D》雜誌合作，推出 iPad上首本 3D電子書！有無《阿凡達》嗰隻咁激？又無咁厲害，講技術，實情係玩懷舊，戴上一副紅藍鏡就睇到，但除咗立體感以外，偏色情況頗嚴重，睇得耐仲會有啲頭暈；不過，呢本電子書好在提供埋 2D/3D切換功能，見暈㩒個掣馬上就變番正常效果，無論睇字，甚至更細小嘅 Caption，肯定方便晒啦！


■兩者分別好大，隨時 㩒個掣就可以切換。

「半電影」風雲盞鬼 香港老中青都有《風雲》 Fans，由初期漫畫推展至開拍電影，家再由電影轉型做電子書！基本上，《風雲 II電影漫畫》似乎係一本書，但睇過 iPad版本之後，或許你未必同意。佢最盞鬼，係每頁間有幾格漫畫可選擇播片，例如間中有海鷗飛過，或有時出現刀光劍影，仲有聲效！ ■另有傳統電子版日本漫畫，但效果麻麻。