至hit魚蛋歌〈勾手指尾〉，鍾一憲(Jason)、麥貝夷(Karene)情侶檔準備年尾擸獎

娛樂圈最怕曲高和寡，任你有驚世技能，冇人聽得明一樣死。

最近網上瘋傳的魚蛋歌（易唱易上口）〈勾手指尾〉，上載兩星期已經突破60萬人次，歌詞簡單旋律易記，加埋MV勁玩iPhone feel，90後睇完超有共鳴，激讚話有初戀感覺。

首歌hit咗，帶挈埋男女主唱鍾一憲（Jason）同麥貝夷（Karene）網上爆紅。據知兩人更打算食住個勢出碟，準備年尾掃獎，忽然紅咗，佢哋都話：「我哋之前籍籍無名，突然一曲成名，真係唔敢相信。」

大名娛樂旗下歌手鍾一憲（Jason）22歲、麥貝夷（Karene）25歲，做咗趙碩之同門3年，一直冇嘢撈等運到，但今年初被公司選中，改以情侶檔姿態出歌試水溫先彈出。

出糧$158.9
未簽約大名前，Jason同Karene本身都係做model同拍廣告出身，簽約3年一直籍籍無名，直至最近兩人合唱一首〈勾手指尾〉，單單兩個禮拜喺YouTube已達60萬人次睇過，成績相當唔錯。講到兩人辛酸史，佢哋表示：「以前我哋真係好霉，又冇人識，簽咗公司又唔可以接出面job，試過有一個月出糧只有$158.9，係近一年先多咗job，今年我哋先有做歌手嘅感覺。」

Fans激讚，年尾爭獎
雖然女大過男兼二人唔係真情侶，但MV中拍得超sweet，Karene就話：「因為我哋太熟啦！不過我都唔介意姊弟戀。」所謂打鐵趁熱，Jason同Karene嚟緊仲會出碟繼續唱情歌，經理人戴夢夢就話：「公司會keep住同佢哋出歌，其實當然想攞獎啦，但係會唔會以組合名義爭呢，呢個就未知，要同公司傾。」趁住今年冇乜組合蒲頭，仲唔起勢攞獎咩！

Model仔彈起
Jason同Karene做歌手之前都有拍過廣告，鍾一憲叫做出過吓隻EP，但講真好難留意到佢哋，家陣彈起咗，應該大把嘢等住接啦！

忽然爆出
網絡威力真係好厲害，一瞬間可以令你紅到上天，但有啲就唱完一首之後就唔見人，人氣呢啲嘢真係好現實嘅！