最初聽到甚麼五區公投，他們是有保留的。有人一頭霧水、有人覺得太激、更有人咬定是議員做騷。多得小圈子議員們尸位素餐，多得廿蚊張懶理基層死活，多得政改方案夠爛，令一批中間派選民漸醒覺到，政制再不改變，小市民只有死路一條。大半生傾向保守、求穩定的小商戶、從前不識功能組別的低收入婦女，都改變初衷，決定 5.16以選票起義。
Vote Hong Kong!
表咗態，起碼心安理得！
(陳永成 53歲 屋邨電器舖老闆)
全港公屋商戶總會主席陳永成，大半生留守屋邨小舖，只求安安穩穩做生意。 03年 7.1逾 50萬人上街反 23條、 04年人大否決 07/08雙普選、 05年 25萬人上街反對鳥籠政改……他只在電器舖「公仔箱」前邊看新聞邊睇檔，「 97後生活逼人，邊有時間上街？」
他從前「絕對唔關心政改」，因為多一票、少一票，不會影響生意。但自從領匯進駐，瘋狂加租逼遷，小商戶向高官申訴，政府又闊佬懶理，他轉向功能組別議員求助，「有幸」認清了權貴的嘴臉，「呢個議員好尊貴，講明唔會同你去遊行，唔會反對政府！」
生活與政制息息相關
最後只得公民黨、民主黨的直選議員介入，協助小商戶搞遊行、罷市抗爭。經此一役，陳永成開始質疑：「點解有啲議員，唔使向大眾負責？」功能組別「有等於冇」，「點解政府仲想增加？」
今年初，陳永成在電視看到公民黨黨魁余若薇宣佈啟動五區公投。他最初只覺大事不妙，「好似點解咁激？係咪會嘥錢？覺得好大件事。」反領匯戰友、公民黨梁家傑助理余冠威一句話，改變他對公投的看法，「佢問我，你唔去改變，情況會好轉咩？」
陳永成續稱，「諗深一層，公投其實都係透過制度去表態。只係用一張選票去表達意見，又冇刀又冇槍，激喺邊度呢？公投用 1.5億，夠起高鐵用 669億咁經典？咁多人去立法會抗議（政府）都一意孤行！」
政制扭曲，小圈子議員偏袒財團，令 53歲的陳永成發覺，生活原來與政制息息相關，小市民不應再政治冷感。 5.16公投，他會在屋邨貼海報，又會親身呼籲商戶投票。他說這一票，是表達不滿的一票，是要踢走功能組別的一票，「少一票就少一分力量，表咗態，起碼心安理得！」
諗諗吓，行動係有意義！
(Benny 65歲 屋邨文具店老闆)
每次選舉，文具店老闆 Benny都會投票。踏實商人是中間派選民，過去一直將選票投給自由黨。當公投五俠宣佈辭職， Benny即時反應是：「都唔知公投搞乜！」他只覺社民連毓民、大嚿、長毛作風激烈，懷疑他們想做政治騷。
要改變既有觀念，需要一點時間，更需要冷靜思考。沒有政黨影響，也不受政府洗腦， Benny花了兩星期了解事件，終於改變這負面印象。「佢哋想反對功能組別，諗諗吓，呢個行動係有意義，功能組別係橡皮圖章，政府講乜佢哋就附和乜！」經歷過領匯風波， Benny認同直選議員的理念，知道他們才會為小市民反映訴求。
北京開出 2017特首普選、 2020普選立法會的時間表，卻沒承諾取消功能組別。最溫和、最務實的小商人也認為，功能組別應在 2012年廢除，「小市民冇資格投票， 30人當中有 14個自動當選，根本代表唔到廣大市民心聲。」
望高官多聽基層心聲
5.16公投， Benny說必會投票，既要盡公民責任，更要向政府表示不滿，希望高官能多聽聽中下階層心聲。 65歲的 Benny，希望民主步伐不要太緩慢， 2017已是他的極限。
班功能組別，似街市講價！
(劉玉珍 時薪20元 洗碗女工)
單親媽媽劉玉珍：「係廿蚊張令我醒覺，要踢走功能組別！」
「勤勞有價！我做到手都粗晒，都係想同兩個小朋友可以生活到落去！」 3月底，時薪 20元的單親媽媽劉玉珍怒闖《城市論壇》單挑「廿蚊張」。是功能組別對小市民的踐踏，令這位基層小女人，由對公投一無所知，到如今清楚說出公司票、團體票等政制缺陷。
1月初，玉珍在反高鐵集會聽到五區公投，她坦言這四字「真係幾深」。「我最關心有冇嘢做，心諗（公投）呢啲嘢，大把人識，唔使我識。」
玉珍每周三天到小食亭洗碗打雜，日做 6小時，時薪 20元；三母子要生活，還要靠約 5,000元的綜援金維持。
為幫補生活，玉珍堅持由將軍澳到筲箕灣上班。直到張宇人拋出時薪 20元甚至可以再低的言論，平日膽怯無知的小女人終於豁出去，獨闖《城市論壇》火併廿蚊張。玉珍那番話，為基層挽回尊嚴，更令自己對小圈子選舉有多點認知。
單挑廿蚊張後冇工開
從前她不接政黨傳單，《城市論壇》一役後，她細閱五區公投的單張，方知香港有種議員叫「功能組別」，驚覺有議員可零票當選、香港原來有甚麼團體票、公司票，但她只得一票。「原來佢哋（功能組別）好有影響力，但帶畀我哋基層嘅影響，多數都係壞影響。」
廿蚊張事後道歉，又拋出時薪 24元方案。玉珍認為，「廿四蚊張」跟「廿蚊張」同樣可恥。「點解業主加租一加幾十萬，你班老闆又唔敢嘈地產商？點解對住班夥計，就要係咁剝削？」「嗰班功能組別，點解 669億高鐵撥款就好豪咁批出去。但講到最低工資，就要逐蚊逐蚊咁拗落去，好似街市講價咁？」
今日再問她何謂五區公投，玉珍的理解是「一人一票，直截了當，唔要功能組別！」單挑廿蚊張後，玉珍的老闆說願只給她一人時薪 33元，條件是「唔好再出嚟嘈」。玉珍強調老闆一直待她不薄，但她一口拒絕，因為她明白，像五區公投，爭取的是改變制度。即使其後她一直「冇工開」，玉珍依然無悔。
沒有留言:
發佈留言