實戰 4G Vs 3G，睇《拳王》快30秒

近期手機話題，唔係揀邊間4G台，就係換邊款 LTE手機！基於發射站分佈、網絡擠塞問題一直存在，就算今日你贏一仗，但明日又輪到我贏番你！齋吹數字又悶又取巧，今日就搵嚟靚女 Irina 扮演 OL，實戰由3G換咗4G後，到底你我每日生活有幾爽先？

記者：陳國輝
攝影：伍慶泉
Model： Irina@Zmodel

■測試嗰陣以「高」畫質睇《拳王》，嘉穎都靚仔晒。

《 myTV》跳播唔使等

睇串流順唔順，除咗要求傳輸速度，網絡穩定亦好重要。靚女 Irina等緊朋友嗰陣，佢打開平日搭港鐵勁多人煲嘅《 myTV》，由啟動 App直至出現《拳王》畫面，加埋只係撈咗3-5秒，而且拖拉影片時亦無發生跳格、起格等問題，表現流暢到極。相反，用3G煲劇雖無影響畫質，但由廣告跳去播片，就足足撈咗30秒先有嘢睇，如果白領人士喺午餐時間，諗住分秒必爭煲劇「伴 Lunch」，相信3G會等到躁晒底。

4G 串流超順

3G 等緩衝幾十秒

■規劃地圖路線亦需要大量數據。

Plan路線即彈街名

食完個 Lunch，好多文職人士，唔係跟住送件就係去其他公司開會，臨行前總會開個地圖規劃吓路線。查實當喺 Google Map「起點」、「終點」上輸入文字嗰陣，同時會顯示合條件嘅街名，甚至有埋附近店舖畀你揀，規劃過程非常流暢；至於3G表現則稍為遲緩，例如當 Irina輸入「尖沙嘴」之後，畫面需停一陣先出現相關嘅街道名稱，整體操作無咁順，不過兩者相差只係2-3秒啫。

4G 路線即睇

3G 停咗喺搜尋度

■單撈幾百 MB高容量檔案的話，兩者分別就更明顯。

雲端撈相一秒一張

當然，開會時總少不免即場交功課，又或 Present畀老細，附有 Video嘅 PowerPoint檔案，閒閒哋幾十 MB，就算簡單如客戶電郵，一張高解像相都分分鐘過1MB，唔係要成班同事等呀？呢個 Moment你惟有求神拜佛個網絡速度生生性性！實地測試，以1MB一張相計，4G單撈根本唔使一秒，快過你屋企條寬頻！而3G大約三秒完成1MB，未算被大幅拋離，不過目前雲端儲存咁流行，正所謂小數怕長計，若然唔係下載1MB而係100MB，你會明白4G幫你人生慳番唔少時間。

4G 一秒一張相

3G 仲 Load緊

■ Sony Xperia GX（售價待定）

同場加映
Sony今夏推 LTE

HTC、 Samsung、 LG等已推出4G手機，但點解少咗日系 Sony呢？其實有日本網站爆料，話 Sony打算喺夏季推出旗下首部支援 LTE技術嘅 Xperia GX，佢唔止下載速度可達到每秒75MB，更內置1.5GHz處理器兼採用4.6吋大屏幕，煲劇一流喎！

HTC One XL

測試小資料
地點：尖沙嘴
時間：下午一點
網絡： one2free
手機： HTC One XL

$5,698

■由電訊管理局出嘅網絡測試 App得知，4G每秒下載量高達21.3MB，係3G的兩倍幾。

4G覆蓋有限

可能測試地點係旺區，4G訊號不俗且穩定。但當入到元朗市中心，結果就由 LTE跌番落 UMTS（3G）；而將軍澳區也出現訊號時有時無嘅情況，唔想斷線惟有揀 Auto Switch，但預咗超食電囉。

四大台無限計劃
one2free

月費：$419（連智能手機）
＊需簽約24個月

中國移動

月費：$398（連智能手機）
＊需簽約24個月

3 HK

月費$418（連智能手機）
＊需簽約24個月

PCCW

月費：$429（連智能手機）
＊需簽約24個月，數據傳輸上限10GB 

無綫 myTV 擬收費，網上追劇擴至全球。

現時無綫黃金時段劇集和節目，
大部份都可在 myTV網上免費重溫。

港人網上追劇必看、平均每月500萬人瀏覽的無綫電視網站 tvb.com，正計劃今年內收費，以後上網追劇需付款；據了解，收費初步考慮為每月數十元，並同時將服務擴至全球，即使市民到了海外，也可上網追劇。

現時無綫黃金時段播出的劇集和節目，大部份都可在 tvb.com的「 myTV」網上免費重溫，當中以劇集最受歡迎，但最多只可重溫七天內播出的劇集，除非越播越有話題的劇集如《天與地》，則限時讓觀眾一次過上網重溫全套劇集。

收月費或買積分

據了解，無綫電視擬在年底前，就網上提供的節目收取費用，目前計劃分兩部份收費，一是上述網上節目重溫，初步考慮以月費模式收費，預料收費不會超過100元；屆時無綫製作的劇集和節目，絕大部份可在網上重溫，只有個別節目因剪輯了大量海外影片片段，或涉版權問題不能放上網。

第二部份則為 VOD（Video On Demand）隨選視訊，將以往無綫製作的劇集放上網，讓人付費點選收看，初步考慮以購買積分方式進行。

由於無綫剛完成一項有關網上收費的調查，目前仍在研究中，尚未決定收費水平和模式。
現時若身在海外就不能上 myTV收看節目，但在推出收費計劃後，服務將擴至全球。
無綫電視自2008年推出網上節目重溫，即大受歡迎；今年 tvb.com平均每月多達500萬人瀏覽，無綫電視外事部強調，500萬是人數而非人次。至於 myTV手機應用程式，自去年11月7日推出至今年2月，下載次數已突破100萬。

2011年至今， myTV最受歡迎的劇集為《潛行狙擊》，平均收視達2.6，即平均每集有16.6萬人收看；2010年播出的《巾幗梟雄之義海豪情》，大結局點擊率逾37萬次，一度釀成網絡大塞車。

香港互聯網協會主席莫乃光表示，現時網上的電視劇多是利用綜合性的平台，按劇收費，少見由電視台自己建立一個收費平台；至於會否成功，「睇吓你收幾錢囉」。

早前有網民估 myTV將來會收費，網民即諷刺「果然係『賣 TV』」，指「要硬食咁多廣告」、「依家好似比之前少咗好多嘢睇，如果仲要收費真係唔掂」。