平賣Norton防毒軟件的小店Opus，被經銷商Symantec列入黑名單，指明「非香港授權之零售商」。
「好似之前有間舖賣平可樂咁，百佳、惠康叫供應商唔畀貨就唔畀貨一樣，呢個世界永遠都冇公平㗎，人哋叫你賣貴啲啫，點解你又唔賣貴？」霸權主義殺到灣仔電腦城，一間售賣防毒軟件龍頭公司Symantec Norton行貨的小店，因為「賣得平過人」，竟遭經銷商列為「非授權零售商」，令其顧客得不到優惠，又沒有售後保養和技術支援。顧客表示憤怒；被欺凌的小店東主更感無奈。讀者蕭小姐早前在灣仔電腦城的Opus Solutions購買了一套Norton Internet Security 2012網絡安全軟件，售價320元（經銷商建議價369元），她事後根據盒面貼上的「免費換領8GB隨身記憶棒」計劃進行上網登記，不料翌日收到經銷商Symantec電郵回覆拒絕受理，理由是「閣下所購買之產品非Symantec Norton授權之零售商所販售之產品」，蕭小姐表示考慮向消委會投訴。
記者到Opus購買同一款軟件，同樣無法取得優惠，記者登上Symantec官方網站查看，發現網站貼上「授權經銷商」名單，並同時出現「Opus Solutions非Symantec Norton香港授權之零售商」一句。與Opus兩舖之隔的兩家Symantec特許商舖Pro-Soft及Advance Software亦貼出有關告示。
小店Opus負責人Anson對總經銷及行家的霸權欺凌表示無奈。
行家：佢哋唔聽話玩寸個價
記者向Pro-Soft店員羅先生查詢，他竟說Opus賣的是水貨，可能無保養及技術支援，又說：「佢哋玩寸晒個價，呢個世界係咁，我每個月同代理攞咁多貨，佢都唔想我哋因為咁而同佢哋少攞貨，我係畀壓力代理要佢咁做，Microsoft直頭封殺佢！唔畀貨佢！」
Advance Software店主Maggie就指Opus因為賣價平而得罪人，被供應商及行家夾擊，「除咗贈品之外，只要出示佢公司單據，全部都唔會support（支援），總之佢唔聽話，玩亂個market（市場）。」據知，Symantec總公司將產品分發給批發商，零售商則經由批發商中取貨。
霸權主義殺入灣仔電腦城。
讀者蕭小姐投訴買正貨都得不到優惠。
有份夾擊賣平貨小店的Pro-Soft店員向記者介紹Norton產品。
Advance Software店主Maggie指Opus賣平嘢得罪人。
受害人：薄利多銷都俾人蝦
Opus負責人Anson在記者放蛇期間，對被行家聯同Symantec總公司針對他大感無奈，「我哋幾個八十後想出嚟合作做下生意，寧願做嘢勤力啲，薄利多銷，開舖早過人，收舖又係我哋最遲，仲生存到就係勤力嘅成果，咁樣都要俾人蝦！」Anson估計他們被針對可能是和人脈有關，「佢想我哋賣建議零售價369蚊，咁樣等於叫我唔使賣。我哋只係想要公平競爭，唔係想一齊圍威喂壟斷個價錢！」
Symantec香港分公司公關回應稱，香港公司網站上列明香港授權零售商的名單，可以讓顧客更清楚了解推廣詳情，但因關注到有顧客從名單以外的零售商購買指定產品，因此會將是次推廣優惠延伸至所有於推廣期內在香港購買該兩款產品的顧客，並可於本月14日前於網上登記免費換領禮品。
Symantec香港總公司銷售部經理Eric Wong坦承，他們要保障其他行家。
支援服務：Symantec：唔係唔搞，係要時間
對於賣平價的小店Opus得不到應有的優惠，Symantec香港總公司銷售部經理Eric Wong對「放蛇」記者直言，該店平時不向公司的代理商取貨，「所以行家就唔係咁鍾意佢，因為佢哋都係競爭者。」那是否代表Symantec不會支援該店賣的貨？Eric否認此說，稱只要買到該公司的產品一樣會得到支援，「只不過唔係我哋香港代理嘅產品，如果有乜問題要經我哋去搞，我哋唔係唔搞，係要時間！」
Eric又承認他們要保障其他行家，因此多數優惠都會提供給指定的零售商。當記者表明身份進一步向Eric查詢時，Eric仍然堅稱是次推廣前與代理講明只有他們指定的零售商才會得到優惠，但承認在印貼紙時漏掉「要在指定零售商購買才有優惠」的字句，但為了避免客人從Opus買到非本地貨才於名單寫明Opus非指定零售商。
打破壟斷：李華明:可向消委會投訴
有份草擬《競爭法》的立法會議員李華明表示，事件中Symantec指明Opus是「非授權零售商」相當罕見，直言即使《公平競爭法》未生效，事主亦可向消委會投訴。他說：「真金白銀買正貨但係冇贈品，我覺得呢單case應該成立。」
李華明認為：「通常係會指明邊啲係合法、授權專賣經銷商，而唔會話邊啲唔係。」李華明認為Symantec做法明顯是針對某些「另類嘅、唔係佢指定嘅人」。他續說，如果供應商有贈品送出並標示在產品盒面，「無論你係咪喺水貨店、唔係指定零售商買到，都無理由唔向買家提供優惠。」
至於水貨問題，李華明表示：「水貨嘅正式叫法係『平衡進口』，喺香港係合法流通，唔存在水貨係假嘢、係非法嘅問題。水貨都係正貨，容許水貨正係打破獨家代理控制價錢嘅局面，應該由消費者格價後自行決定購買產品。」
沒有留言:
發佈留言