香港咁多個 Forum，論見報率最高都應該係高登，事無大小都推到上報，全靠背後有一班毒男讓口水飛。巴打們，事前聲明，話高登多毒男嘅唔係小記，而係《毒男手記》作者 Cuson，自命曾經係毒男嘅佢仲細數出毒男 5大特徵，如果你 5樣有晒，表示真係中「毒」太深啦！
No.1 幾包紙巾跟身
究竟點先叫毒？ Cuson認為相由心生，真係有樣睇！「可能好多人做 IT，我太太都做 IT，可能工作需要，通常都係恤衫攝晒入褲。」唔止外表老老實實，仲永遠有個背囊跟身， Cuson爆咗入面有乜，「通常平時着波鞋、牛仔褲，一定有個背囊，裏面會有樽水，用咗好耐再 Refill；相機、漫畫、手提遊戲機都會有，仲有幾包開咗嘅紙巾。」唔止衣着有 Dress Code，就連性格都有相同之處，「可能有人唔太注重外表，唔太剪頭髮，又或者有暗瘡，個樣差自然自信心小咗，我都覺得毒男可能自信心唔夠，搞到個人內向啲。」
No.2 上高登吹水
網上世界蒲點咁多， Cuson指出毒男都有聚腳地，「我覺得高登真係好多毒男，佢哋多數都係去 Forum，已經聚集咗好耐有班人喺度。」成日都叫班巴打吹水，話題不外乎日本 AV同日常生活，「電視做緊乜節目，佢哋就會開個 Post，例如開個『 XXX討論區』，佢哋就會發表自己意見同睇法；例如見到啲女明星，就會話 J過佢。」 Cuson指高登人最毒嘅行為，就係將私人嘢 Post上網，「 J呢樣嘢已經變得唔係咁私人，可以好暢所欲言講，對幅 J圖 J過，已經好開放，不過都只係網上高登會咁講，出嚟見面都唔會夠膽講。」網上術語「 J」，作為名詞可以指男性性器，用作動詞當然係指自慰，至於 J圖，正正係 JJ時用到嘅材料。
No.3 儲美女相另有企圖？
毒男唔係成日匿係屋企，星期六日都有街去，「仲有會做龍友，成日都見到佢哋拿住部相機，去西洋菜街影啲 Show Girl。因為我住附近，經過真係會見到有大班佬圍住女影。」 Cuson說，「佢哋完全唔介意身邊啲人點睇，會 Zoom埋去啲重要部位狂影。」原來毒男之意不在影，「平時少接觸異性，喺街可以近距離接觸，返到屋企睇啲相可能會有 Fantasy。佢哋仲會有鋪儲美女相嘅癮，可能會貼上網同其他毒男 Share。」
No.4 喪蒲女僕 Cafe
Cuson認為毒男流連地方唔多，「一個人可以去得邊，多數都係茶餐廳，高級啲都唔會去啦！茶餐廳最好，閒時會去女僕 Cafe。」
女僕 Cafe唔係人人去過， Cuson就有第一身體驗，「我上過去一次，佢哋會叫『主人』，不過佢哋真人真係唔掂。」 Cuson說，「可能少接觸異性，覺得係女就得，又可能接觸得多日本文化，鍾意有人叫自己做主人。」想搵女性陪自己， Cafe比夜總會更有優勢，「夜總會貴嘛，消費力係一個問題，佢哋唔會好富貴。去女僕 Cafe都叫做正統啲，同人講都係話自己去 Cafe，又唔係召妓！」
女僕 Cafe唔係人人去過， Cuson就有第一身體驗，「我上過去一次，佢哋會叫『主人』，不過佢哋真人真係唔掂。」 Cuson說，「可能少接觸異性，覺得係女就得，又可能接觸得多日本文化，鍾意有人叫自己做主人。」想搵女性陪自己， Cafe比夜總會更有優勢，「夜總會貴嘛，消費力係一個問題，佢哋唔會好富貴。去女僕 Cafe都叫做正統啲，同人講都係話自己去 Cafe，又唔係召妓！」
No.5 同公仔傾偈
毒男有時唔鍾意打機，玩嘅玩具亦有共同喜好，「鍾意動漫女性角色嘅手辦，例如初音，頭上有兩條辮好長，係一個模擬歌星，喺日本好紅，仲開過演唱會。」迷假偶像未算最毒，將假嘢當真人真係毒到無朋友，「有啲真係好毒好毒嘅毒男，會帶埋個公仔跟身，得閒就拎出嚟影吓相，更甚可能會同佢哋傾偈。」
漫畫節奇人輩出，有娜姐 Fans更被封為世紀毒男，證明係佢哋嘅天堂，「成日都會去握手會同簽名會，同埋書展嗰啲大型 Event。仲有一個活動叫做『同人祭』，一年會搞兩次，好多毒男都會去呢啲活動。」 Cuson說，「一來可以影相，另外啲 Cosplayer會着得好少布，佢哋唔介意袒胸露臂。」
漫畫節奇人輩出，有娜姐 Fans更被封為世紀毒男，證明係佢哋嘅天堂，「成日都會去握手會同簽名會，同埋書展嗰啲大型 Event。仲有一個活動叫做『同人祭』，一年會搞兩次，好多毒男都會去呢啲活動。」 Cuson說，「一來可以影相，另外啲 Cosplayer會着得好少布，佢哋唔介意袒胸露臂。」
毒男自白
雖然已經家有嬌妻，但作者 Cuson亦自命婚前曾經係毒男一族，更將日常遇到嘅趣事化成四格漫畫，推上免費報紙做連載。早前終於將咁多個古仔輯印成書，情節熟口熟面，得意搞笑，毒男實有共鳴！
沒有留言:
發佈留言