特區卧底警混入7.1示威無間道！叫口號時封嘴被網民揭穿！

網民發現 7.1當日三位疑似警員混入遊行隊伍扮示威者，
幫佢哋起咗個朵叫無間家庭，據講無間媽媽係公眾活動聯絡組副主管。

若要人不知，唔好太低 B。 7.1遊行後，逾千示威者佔據中環，唔少卧底警混入示威者當中。其中三名「無間道」冇嚟醒目，卧底身份被網民揭穿。高登網民幫呢三個無間道起朵，叫佢哋做「無間家庭」。當晚佢哋混進人民力量當中，一時跟大隊遊行，一時又踎低扮堵塞道路，扮鬼扮馬不斷收風攞料。

叫口號時卧底封嘴

無間家庭清一色穿着深藍色 polo恤，孭住背囊，跟大隊一齊踎低堵塞道路。齋睇好似一個熱愛民主嘅和諧家庭，點知原來係各懷鬼胎，一人一部耳機不斷滙報現場情況，終於露出馬腳。網友話每次嗌口號時，特別係叫警方食屎，或同警方爆發衝突，無間家庭都自動收口或閃埋一邊，網民影低佢哋「全家福」，無間媽咪即時用傳單遮臉，最諷刺係張傳單劈頭寫住「反對警權肆虐」。

起底組「巴打」即時做嘢，懷疑個無間媽咪係警方行動部公眾活動聯絡組嘅副主管陳秀玉，唔少社運人士都話畀呢位 Madam陳「招呼」過，有人仲將佢張卡片放上網。八方就根據卡片上嘅手機號碼聯絡 Madam陳，點知打咗成晚都飛咗去留言信箱，冇人回覆。其實警方派卧底混進示威人群都唔係第一次。

藝術工作者黃洋達喺 facebook留言話，當日遊行知道有大量便衣混入，特登喺台上叫口號「曾偉雄，食屎」，成班便衣警冇人敢出聲。當晚亦有示威者舉起牌，指根據《警察通例》，警員必須掛起委任證，抗議班無間道鬼鬼祟祟咁收風。有網民就話，如果班警察唔想俾人認出，下次示威可以戴面具，認真好「橋」。睇怕卧底警察下次都要諗個新造型亮相。