facebook 貼活動列選舉廣告

《區議會選舉活動指引》講到明，候選人喺 facebook展示選舉廣告，要向選舉事務處申報，簡單啲講，即係候選人求其喺 facebook貼張落區相，都要影印副本畀處方計入開支。

民建聯為免麻煩，指令候選人競選期間停用 facebook，民主黨唔忿氣，候選人只喺 facebook加多句聲明「打底」：「本人的 facebook已將私隱度設定為只有朋友可瀏覽內容，只供私人交談，不作選舉之用。」點知始終過唔到選舉事務處嗰關，處方噚日通知民主黨秘書處，話唔理有冇聲明，只要內容涉及選舉都當作選舉廣告，反建議候選人斬腳趾避沙蟲，就係將 Facebook設定為禁止讓人 tag或留言。

民主黨林立志係「打底聲明」發起人之一，佢話選舉事務處個安排極之 out，實際上難以執行，擬發起「罷申報」行動，向選管會主席馮驊抗議。